[KOREA] 每年近百團出道!有咩組合/個人歌手其實值得更紅?
2018年05月16日21:00
0
0

依加K-POP已經全球流行,世界各地嘅韓迷都為自己嘅OPPA UNNIE面瘋狂,有部分仲會參加啲公司嘅Audition希望可以更加親近偶像甚至成為下一粒星!眾所周知韓星工廠練習生數量極多,成功出道嘅得1%,可以紅到嘅就更少。係每年都有近百個單位出道嘅韓流之中,有唔少組合同個人歌手都極具實力,就只差天時地利人和就可以更加紅!!

1. AKMU 樂童音樂家

1st Single Album - Summer Episode (2017)

兄妹檔李燦赫同李秀賢成為《K-pop Star 2》冠軍後加入YG成為Big Bang嘅師弟妹,係2014以正規專輯《Play》正式出道。出道以黎哥哥李燦赫唔單止負責作曲作詞,亦都係每張專輯嘅Producer,唱歌同Rap都完全難佢唔到,音樂才華真係無庸置疑!但上帝係公平嘅所以扣咗佢少少身高同樣貌(笑) 而妹妹清爽甜美嘅聲線加上超齡嘅唱功為AKMU錦上添花〜兩兄妹嘅日常互動亦都睇到Fans津津樂道,但自從哥哥去咗當兵之後就冇再出歌,即使哥哥已經為唔使當兵嘅妹妹準備好足夠嘅歌,再誠懇咁求梁社長俾個妹出歌,都係未獲接納,妹妹就暫時靠自己努力以Youtuber身分去維持人氣...加油啊編輯會等你地CB架!!!

2. B.A.P

8th Mini Album - EGO

諗起當年B.A.P同EXO同年出道,B.A.P個勢真係勁EXO好多好多,但依加EXO上咗一線,B.A.P就停留咗係二線...B.A.P成員畀編輯嘅感覺係每個人都有好強嘅氣場,而且都好有實力!鄭大賢嘅顏值同同唱功亦絕對吸飯,另外隊長方容國低沉嘅聲線可以話係B.A.P嘅Signature Voice,而且仲會作曲作詞,又一個注定食音樂呢行飯嘅人!可惜嘅係喺上位時期同公司TS Entertainment有合約糾紛要打官司而無活動一段時間,令到人氣下跌,錯失咗最好嘅上位時機後就一直浮浮沉沉,但始終都去唔返以前嘅盛勢,但憑佢地嘅實力絕對值得更紅。

3. B1A4

7th Mini Album - Rollin' (2017)

B1A4要樣貌有樣貌,要才華有才華,而且啲歌都好好聽,編輯都諗唔明點解佢地上唔到一線?!振永、CNU、燦多作過唔少膾炙人口嘅流行曲同OST,各成員亦有參演唔同嘅韓劇、MV、廣告代,知名度同人都應該有返咁上下,但偏偏就係紅唔起!到底有無人可以話俾編輯知,點解佢地仲未紅?!

4. CLC

7th Mini Album - Black Dress (2018)

CLC初出道到師姐團4minute解散前都行韓國人最buy嘅可愛清純路線,可惜表現唔太標青未能夠突出重圍,直到《Hobgoblin》行咗次Girl Crush路線開始有啲起色,但下一次CB又行返清純路線,反應當然都係麻麻啦。所以最近一次回歸公司又再行返Girl Crush路線,但咁樣唔單止令Fans無所適從,亦令CLC嘅定位變得模糊,好難可以成功上位。如果當初將有一定人氣、《K-pop Star Hunt》冠軍嘅Sorn捧紅咗先,CLC依家嘅發展可能會好唔同。但依加公司啱啱推咗新團(G)I-DLE,Girl Crush路線似乎會留俾師妹團,睇黎CLC又要再搵另一條出路。

5. LEE HI

2nd Album - Seoulite (2016)

同樣係《K-pop Star》節目出身嘅LEE HI李夏怡係比賽過程中就已經充份展示咗佢嘅歌唱實力,本來YG計劃LEE HI會以組合形式出道,但後來就宣布同其他幾位成員無條件解約,LEE HI就變咗以個人身分出道。以為加盟YG前路一定幾光明,點知自從16年出咗二輯之後就無再出新歌,梁社長好似完全忘記咗呢個唱功好又可愛嘅年糕妹子...雖然最近係日本出咗日本Debut Album,但只係將舊歌放埋一齊再加日文version嘅《Rose》同《Breathe》,編輯表示好想聽到佢新嘅歌...

6. LOVELYZ

4th Mini Album - 治癒 (2018)

有次係Youtube聽緊歌嘅時候咁啱播到LOVELYZ嘅MR Remove,編輯俾LOVELYZ嘅現場實力驚艷到!雖然話編舞唔激烈嘅佢地唱起歌黎梗係會穩定啲,但佢地嘅現場係好似播CD一樣咁,如果背景音樂突然出事編輯都覺得佢地完全無壓力〜LOVELYZ仲未可以大紅嘅主要原因可以話係揀錯回歸時間,差唔多每次CB都撞正其他大團例如AOA、iKON、TWICE,令佢地出道四年黎只有喺《The Show》攞過三次一位,但以佢地可以全團做主唱嘅實力黎講,絕對值得比依家更紅,希望佢地黎緊可以一直行花路啦!

7. TEEN TOP

6th Mini Album - NATURAL BORN TEEN TOP (2015)

最後編輯覺得TEEN TOP真係應該更加紅!!2010年以平均16.3歲當時成為最年輕出道嘅組合,Niel超獨特嘅聲線啲人一聽就會知係TEEN TOP嘅歌,加上天地嘅外貌同力量唱功,令TEEN TOP一出道就成功吸引咗一班Fans,特別係一班姐姐飯。整齊劃一嘅刀群舞就係佢地嘅標誌,佢仲話過練舞時候有跳起動作嘅話,佢地會堅持練到六個人落地只有一下地板聲為止!呢份熱血完全感動到編輯 (當年編輯都係個不折不扣嘅Angel,嘻),亦畀一眾韓迷見到佢地嘅熱誠同能力,成功以《Miss Right》同《Rocking》衝上事業高峰!!可惜又係公司問題,紅起咗之後嘅歌路轉變咗少少,加上因為L.Joe個人嘅意向同公司配合唔到而約滿不續,令TEEN TOP變成五人組合,亦流失咗唔少Fans,人氣開始下跌,但仲年輕嘅TEEN TOP如果再遇到首神曲,一定可以紅得返架!!

這篇文章 [KOREA] 每年近百團出道!有咩組合/個人歌手其實值得更紅? 最早出現於 GIRLTALK 有班女仔

關注我們Facebook專頁
    相關新聞
      更多瀏覽