林欣彤情人節推新歌曲《忍》搵好姐妹陳慧敏友情演出
2018年02月14日17:54

林欣彤(Mag)去年年尾重新演繹Dear Jane的《哪裏只得我共你?》,其溫婉唱腔不但贏盡好評,其處女執導MV更在短短一個多月時間,在youtube獲得逾63萬點擊,為2017年劃上完美句號。為了承接優勢,Mag相隔不足兩個月再度在今年情人節2月14號推出全新歌曲《忍》,並請來認識逾七載的好姊妹兼戰友陳慧敏友情演出MV。

MV劇情講述飾演第三者的Mag,在一間充滿情調的餐廳安慰失戀的好友陳慧敏時,竟撞正男友向其正印求婚,由於「刺激」過度,向來對該段孽戀「忍得幾多得幾多」的Mag,終按捺不住情緒擸手袋秒速離開餐廳,更在中環街頭拔足狂跑,情節頗激。為了配合餐廳營業時間,MV需通宵進行拍攝,令最近習慣早睡早起的陳慧敏在現場呵欠連篇。不過與Mag份屬友好的她相當唔話得,只要導演一嗌Roll機,即能馬上回復精神投入拍攝,而且影后上身話喊就喊,令Mag與現場工作人員大感佩服。

至於拍攝狂奔戲份當晚,雖然氣溫只有十度,但為了配合劇情,Mag需穿著單薄衣服在街上跑足十幾廿次,更要一邊跑一邊放聲大哭兼頹爆跌坐地上,極考抵冷能力及演技。雖然鏡頭後凍到腳都震,但Mag全程毫無怨言,即使只是拍攝手部動作,仍堅持親身上陣。

事後Mag笑言整個拍攝過程最辛苦不是捱眼瞓及捱凍,而是爆喊:「我份人平時都唔係咁易喊,我好驚拍嗰陣因為喊唔出阻大家收工,所以拍之前都幾大壓力。我早一、兩日開始已經儲定啲唔開心嘢,希望逼到自己喊。」她又表示十分感激好友陳慧敏傾力演出:「真係好多謝佢,因為佢係特登由澳門坐船過嚟香港幫我拍呢個MV,而且因為導演要求好高,我哋一拍就拍咗七、八個鐘,搞到佢成朝頭早七點先收工,我真係相當唔好意思。」

是次MV內容及方向,亦是由Mag一手一腳策劃,並與導演及工作人員經過多次開會溝通,問到為何有此構思,Mag表示:「其實點解會有呢隻歌《忍》呢?係因為我有個朋友覺得我份人乜都好鍾意忍,大家傾傾吓就覺得可以試做呢隻歌。同埋我覺得情人節係一個好特別嘅節日,雖然有好多情侶會開心慶祝,但其實好多單身、或者感情生活唔係咁如意嘅人,係好想skip咗呢個節日,所以好想送呢隻歌畀佢哋,話畀佢哋知,you are not alone嘅。」

原文連結:

林欣彤情人節推新歌曲《忍》搵好姐妹陳慧敏友情演出

相關文章:

鉅星慈善之夜暨團年晚宴 Sammi、林峯連場勁歌熱舞 代言人張智霖笑指集團有品味

Stars-HK娛網

本站集中報道娛樂新聞,包括在音樂圈、電影圈、電視圈、劇團裡面,歌手和演員的活動和最新動向等。我們採取「只談專業,不談緋聞」的編審方針,希望帶給讀者清新的體驗。無論是中、港、台、日、韓等地的大明星以至新人的消息,娛網都會悉數報道。我們也會重點發掘未來新星,致力推廣。

關注我們Facebook專頁
    相關新聞
      更多瀏覽