廉航賺到盡 唔加錢揀位注定分開坐?!焗坐中間位 最離譜23人分23行坐
2018年02月12日16:55

要慳錢搭廉航,預咗樣樣都計錢:行李、食物飲品、extra legroom逐樣計,其實一個願打一個願捱好fair,但有廉航為咗賺盡「揀位費」,特登將同行乘客random地分開坐,最離譜試過23人同行分開23行坐!仲要被派晒中間位,勁賤囉!

文:杜遊珍|資料來源:TelegraphThe Points Guy

延伸閱讀:

【泰國美食】12間曼谷地道餐廳 胡慧冲推介大大隻龍蝦麵、閨密花店Cafe

閨密2人同遊 抵過廉航!$1,080平飛大阪、東京、首爾|港航全新日韓通套票

揀位費 唔只廉航收

廉航除咗機票之外,行李、飛機餐按需要逐樣收費,其實好合理;但揀位費,原來部分傳統航空都會額外收取,講緊嘅唔係揀第一行或逃生門較闊落嘅特別位,而係一般Econ位都有機會收取!最近英國民航局有項乘客統計,發現不少人在沒有付費揀位情況下,被迫與同一booking內的同行乘客分開坐,當中以廉航瑞安航空(Ryanair)情況最多,其次就是中東三寶阿聯酋航空及維珍航空。原來除了廉航,傳統航空公司一般都有online check-in揀位服務,但如果想在開放check-in前mark定位,都有機會收費。

Ryanair在訂票時開宗明義話「如果唔想坐中間位就畀錢訂位吧!」
若購買阿聯酋航空最平的優惠票,登機前48小時或之前想預先揀位都要畀錢。

揀位費 原來好襟計

飛機上的揀位費,當然是航空公司賺到盡諗出來嘅方法,因為家庭同行當然想確保一齊坐,或者同上司/同事出差當然想分開坐!咁究竟揀位費可以賺到幾盡?阿珍睇過幾間廉航,HK Express同Jetstar每程收$50,香草航空$46,Airasia最平只收$20起,不過原來傳統航空收揀位費收得更盡!根㯫The Points Guy資料,最貴嘅揀位費係英國航空,阿珍上官網check都嚇親,竟然一程要畀$284!仲要只可以揀機尾走廊中排位,坐前少少同左右排位仲貴啲,超級搶錢!

英航坐到機尾中間排座位,預先揀位收$284一程,坐左右排仲再貴啲!

再check埋商務艙,就算畀到接近$40,000來回,都要收$861/程!不過假如你是高級會員,就可以豁免揀位費或比普通乘客早於登機24小時前免費揀位。

坐business class張機票咁貴,預先mark位都要收費!

其次就係荷航KLM,每程收$192起;同集團的法國航空收$180一程,比廉航Ryanair的10歐羅(約$100)都要貴!

法航揀位費由$180起,但清楚提示起飛前30小時check-in可以免費揀位,比同系的KLM好心地。

鬧爆廉航Ryanair 有吉位都被逼分開

不過即使唔畀錢mark位,傳統航空在online check-in時都仲可以免費揀位,除非你遲了check-in無位揀,但廉中之廉嘅Ryanair據統計每3組乘客就有1組因為無訂位要分開坐,仲有傳系統會夾硬拆散booking內同行乘客,即使班機唔滿、有吉位都編成分開坐,焗乘客畀錢mark位,最離譜一個case,係一行23人出門坐Ryanair,結果攝晒23人去唔同行數的中間位,認真可怒也!

網上有人指出Ryanair試過將23個人的booking編晒去唔同行數的中間位!(圖片:Gettyimages)

避免廉航分開坐:記得一齊check-in!

幸好,呢個只係英國finding,so far阿珍甚少聽見亞洲地區廉航咁離譜,大家都知香港客最鍾意投訴,玩到咁大只會釀成關公災難!雖然都有見過同行人事分開坐,若果唔想發生又唔想畀錢,首先要睇下班機full唔full,爆滿的話記得早啲去機場check-in,同事最好一齊check-in,如果自己勁遲check-in無得一齊坐,都唔好怨地勤,佢哋都無辦法。

下一頁:經驗機師提醒你!想順利到達目的地?搭飛機10個「不」

0
0

延伸閱讀:

觀光客注意 | 奈良公園鹿傷人案件大增 被咬的大部分是中國人!

關注我們Facebook專頁
    相關新聞
      更多瀏覽