【朋友係要見嘅】張繼聰謝安琪拋女棄子Gathering 許廷鏗欣宜攬頭攬頸
2017年09月20日07:00

張繼聰同謝安琪兩公婆難得唔駛工作同湊細路,放自己一陣假,同蘇耀宗(細So)等朋友Gathering,張繼聰留言:「因為工作同埋照顧小朋友,好耐都冇同朋友聚會囉,今晚有幾開心?你睇我哋係呢個位影相,就知我哋幾猛幾有情懷啦」,而佢哋大合照嘅地方,正正係尖沙咀一個商場外,可謂遊客必影勝地。

而許廷鏗(Alfred)呢日就一拖三,同鄭欣宜、林欣彤、謝茜嘉一齊去食壽司,佢同欣宜一向老友鬼鬼,合照時更不避嫌攬頭攬頸,Alfred留言:「朋友係要見嘅!」

應屆港冠軍雷莊𠒇就實踐咗呢句至理明言,香港小姐選舉曲終人未散,呢日佢同亞軍何依婷、季軍黃瑋琪、張寶欣、落選嘅「仙氣李若彤」伍樂怡同胡美貽等一大班港姐Gathering,齊齊打邊爐烚吓烚吓。雷莊𠒇於社交網站大晒多張合照。

關注我們Facebook專頁
    相關新聞
      更多瀏覽