轉玩地下情 張振朗 秘飛星見家長
2017年08月25日17:46

近日憑《踩過界》彈出的 張振朗 ,跟同屆藝員訓練班34D咪神陳芷尤被本刊踢爆在深井同居,但公司柯打戀情要低調,拍拖亦要收收埋埋。七月時, 張振朗 襯生日飛新加坡陪女友兼見家長,二人對外守口如瓶,但原來在當地拍拖相當甜蜜,最近就有拍拖相漏出,踢爆二人親密外遊,難得就算上緊位, 張振朗 對女友仲係一條心!

張振朗 《踩過界》床戰李佳芯

30歲 張振朗 近日憑《踩過界》做花弗私家偵探出晒位,在劇中更會同女神李佳芯有場激烈床戰, 張振朗 更大膽到連打李佳芯30下屁股,聽落都巳經㷫烚烚!令唔少人期待!拍劇夠投入,但現實中的 張振朗 對感情同樣投入專一,就算之前同拍劇演員龔嘉欣、陳瀅傳緋聞,原來全都係煙幕,跟拍拖三年女友34D咪神陳芷尤仲係熱戀期!

首次同李佳芯拍超激床戲,張振朗就話同對方很熟,大家知大家係邊種人!所以絕不尷尬!

埋身肉博兼激咀!

一齊過生日

雖然忙於拍劇,但七月二十日是 張振朗 生日,他就揀咗秘密陪女友Apple返新加坡見家長。「咪睇Owen外表好似好花弗,佢對女友其實好專一,佢一有時間就會陪女友,果次因為Apple在當地拍緊嘢,佢專登去探班,一齊過生日!其實拍拖都三年,佢一早見晒家長,呢次都順便去探下Apple屋企人!」但近日成為珍姐頭寵的他,被要求將戀情低調。「話晒上緊位,唔想俾人覺得佢只係掛住拍拖,公司講明要佢低調啲,最好少提拍拖嘅嘢!」知情者說。

陳芷尤在新加坡拍戲,壽星仔張振朗專誠飛過去探班,相當細心!唔止見晒家長,張振朗跟女友班friend都好熟!

人在新加坡,張振朗亦放下戒心,行街食飯都無咁避忌!秘遊法國荷蘭

張振朗 接受本刊記者訪問,問到上個月係咪去咗新加坡?佢話:「咁都search到!(係咪陪女朋友陳芷尤返鄉下?)好朋友……去行吓咁!(有冇見到佢屋企人同朋友?)食飯一定有,都有見過嘅!其實因為佢喺嗰邊拍緊戲,我去探佢班,睇吓佢拍成點!」問公司有冇叫二人戀情低調?佢話:「公司唔會阻礙我拍拖,係畀好多自由我嘅!我哋係有共識低調戀情,我哋永遠覺得工作係行先,因為好怕出親嚟都被問拍拖嘅嘢,反而忽略工作嘅嘢,所以依家一定以工作行先!公司真係畀好多機會我,所以更加唔想人覺得我掛住拍拖!所以我哋成日都話大家係好朋友來囉!」

其實早在今年五月,二人已經秘密同遊法國荷蘭,一樣唔敢公開,可惜因為分別在lG打卡,就算只係放單人相,仍然被眼利網民踼爆!雖然拍拖避忌唔敢張揚,但好明顯34D咪神已經箍到張振朗實一實!男方就算同一班索女拍劇都成絕緣體!

14年仲係新人的 張振朗 ,同一齊在25屆藝員訓練班畢業的陳芷尤,就因同拍《愛回家》朝夕相對好快撻着,更極速在深井同居,但當時二人仍是新人,怕拍拖影響事業,當時被本刊斷正,二人亦只以大家住同一屋苑來解畫!咁又係,話晒俾珍姐點名力捧,一劇接一劇,張振朗點都要事業行先!

14年因拍《愛回家》撻著,張振朗極速同陳芷尤在深井同居!但因被公司打壓戀情,當時張振朗就解畫說二人只是鄰居關係!

同王浩信蔡思貝李佳芯拍《踩過界》齊齊出位,開心之餘,張振朗表示最希望四人可以再度合作拍劇!全文完

相關文章:

去日、韓、台睇 紅葉 !激抵早鳥優惠買機票送兩晚住宿

Mandy Lieu 得戚晒肚 Heidi飛英箝洗米華

一年冇假放 捱到虛脫 王浩信 硬撐湊女

關注我們Facebook專頁
    相關新聞
      更多瀏覽