〈娛樂乜乜乜〉9歲女唱歌係被逼?你肯定?
2017年06月19日12:30

【now.com娛樂】一個香港9歲女童Celine,唱Celine Dion唱到去美國America's Got Talent,好聽到全場起身拍爛手掌,未係最估唔到;最估唔到嘅係,威水過後,香港人嘅冷嘲熱諷,負評如潮,我好驚訝點解一嚟就要對一個細路女咁苛刻?佢真係被逼唱歌冇童年?你肯定?絕大部分香港人,好似都係啱啱識佢咋喎。

好多人鬧佢冇童真,9歲女上到台好似個大人咁,我睇返片段,又唔覺吖,好得意喎佢,佢只係擁有超越同年齡小朋友嘅淡定啫!America's Got Talent經常都有小朋友表演,好多都好出色,我睇唔到同Celine有乜分別,點解外國嘅小朋友表演得好就要share就要讚,香港人上到去就係冇童真?真心唔明。

其實正牌Celine Dion都係童年就咁天才,細細個就知道自己要唱歌,當時冇咁多渠道俾呢啲天才兒童演出,但佢都好犀利,12歲就有自己第一首作品,被經理人發掘,經理人仲按埋樓俾佢出碟。大家都可以去YouYube聽返佢第一首歌〈Ce n'était qu'un rêve〉,12歲,已經好成熟。

我覺得最重要嘅一件事,係究竟當事人係咪真係鍾意唱歌先?如果佢係真心鍾意唱歌,又真係有做歌手嘅夢想,而並非被父母威逼利誘去做,冇問題喎。小朋友將來想做籃球員,就去打多啲波;想做畫家,就畫多啲畫,有乜問題?唱歌都係正正當當嘅興趣,而家佢唔係好似萬寧妹妹咁被個阿媽推佢去拍寫真吖嘛,佢只係去搵自己個舞台,俾人睇到自己嘅天份啫,係咪?定還是你更想見到呢個9歲女仔放棄佢嘅夢想,返去繼續接受香港教育嘅洗禮,讀完書出嚟安安份份打工,同所有人一樣為上唔到車煩惱,被社會壓榨,咁先係心目中「應該係咁」嘅童年?

其實鬧真係冇問題,但鬧都應該清楚個內情先。我唔係想幫呢個小朋友或佢哋嘅父母講好說話,我都唔識佢哋,問題係你點樣去judge一件事,係按手頭上已有嘅information?還是按自己嘅想像?即是咁,已知嘅information只有一個9歲女仔,上得到美國America's Got Talent,唱Celine Dion嘅〈My Heart Will Go On〉,全場起立鼓掌。嗰啲乜嘢冇童年呀、逼個女去唱歌呀、老竇老母想靠佢做搖錢樹呀、犧牲讀書時間呀、淨係想出風頭呀等等,未必唔係事實,但當下冇人可以肯定,係咪先?如果一個人能公平地就住已知嘅資訊去評論,點解唔可以真誠地俾啲鼓勵個小朋友?吝惜讚賞,選擇相信自己想像嘅一面,咁樣嘅負評,在那個moment,公道嗎?

文:魯連

〈娛樂乜乜乜〉逢星期一至五刊登

將每日的娛樂熱話,以全新角度為大家

點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

關注我們Facebook專頁
    相關新聞
      更多瀏覽