無限「 薰衣草 」園!!! 真假薰衣草大不同
2017年05月19日17:00

夏天就係 薰衣草 嘅天下!紫醉浪漫嘅無邊花海,有邊個女仔唔恨!?即使日本、台灣,甚至大陸都有薰衣草花田,但係元祖級的普羅旺斯係元勝半個地球嘅! 南法薰衣草 每年產量佔全球9成,畝數達8千萬平方米,澎湃程度彷要淹沒整個南法。要感受南法的伊甸園盛夏,儲低呢份達人秘笈,來年7月上旬出發,必定可以睇到以下澎湃畫面!

撰文:字旅航間 Outside the Window|攝影:Wyman |協助拍攝:Zenobeebee à Paris

世界級浪漫 心形樹傳說

隨便走上一條公路,都不停擦身大片紫海。不過奄尖嘅我點會求其收貨,去得就要搵靚絕南法嘅薰衣草花景!Valensole和Sault都是著名的花鎮,前者滿開期較早(6月尾至7月10日),後者滿開期則為7月中至下旬。不過因為Valensole薰衣草面積更廣闊,仲有呢個心形樹絕景位,推薦大家7月初出發!

秘密位置:往小鎮Valensole的D6公路Route De Manosque,GPS定位 43.9, 5.94

拍攝貼士:呢片薰衣草原有一定斜度,輕輕低炒已經有一條條花叢延伸嘅效果,盡頭的心形樹鶴立花群,超級浪漫!!

大風一吹,醒神嘅薰衣草香氣令人為之一陣,整條薰衣草花叢左右搖曳,怒我剎風景,好似蠕動嘅毛毛蟲……

現場有多對新人拍攝婚照,相信羨煞唔少港女!Bonjour~~~

若不幸被蜜蜂螫到,唔使用劍嘅,輕塗薰衣草精油就有舒緩作用。

賞花黃金時間 在黃昏

雖然薰衣草花海好浪漫,但溫馨提示返:現場係極之多蜜蜂!!!賞花最好選在清晨8時前或下午5時左右,避開咗正午嘅暴曬時份,同煩厭的蜜蜂嗡嗡聲。接近黃昏,陽光側射,花叢效果最立體,加上蜜蜂歸巢釀蜜,最重要係暉映出前所未有嘅醉人香檳色,三贏!

銷魂香檳色係會令到女仔睇到唔捨得走!

全普羅旺斯 薰衣草分布

每年的薰衣草花期相若,大致由6月尾維持至8月上旬,Valensole 最綻放的盛開期則鎖定在7月上旬,而Sault 的滿開期為7月中,其後花農陸續收割,薰衣草顏色變暗啞。錯過咗鮮艷的紫色薰衣草必定會飲恨,所以擇日子出票要準!

咪錯過 同期其他花海

薰衣草以外,7月初開得燦爛的仲有太陽花海,至到8月中都睇到,但後期花蕾會被曬得乾涸凋謝。太陽花田位置多時毗鄰薰衣草,自駕一路上不難找到!就像心形樹花海,左走10分鐘,已經搵到呢片澄黃花田!

花莖高至大半身,花蕾大得蓋過臉,好誇張!

南法的秘密 真薰衣草才矜貴

一邊沉醉於薰衣草美景,自喻半個南法人的 Zenobeebee 一邊在旁喃嘸:「 這鮮艷的薰衣草稱不上真正普羅旺斯的『 藍色黃金 』,靚歸靚,無藥 用價值!跟我來∼ 」攀過迂迴的山路,來到位處 1,100米海拔的高地Lagarde d’Apt。

真薰衣草至少在800米的海拔生長,還會夾雜淡白的褪色異品,原來混合自然多漾的基因才能煉出上等精油。

莊主John打理的薰衣草顏色淡雅,氣味無咁嗆鼻,明顯少份俗氣!原來早幾日隨處可見的薰衣草正稱Lavendin,即使用在護膚品,氣味濃郁,卻無助鬆弛神經和止痛消炎。所以 Zeno 在選購薰衣草產品時,非常執著於有沒有 AOC 認證,用上皮膚先安心嘛!可惜真薰衣草莊園是遊客止步,轉移到其博物館,搜購 Zeno 信心擔保的貪靚用品啦!

市面上連一些國際大牌等薰衣草香味,都取自假薰衣草。(法國薰衣草品牌 Le Château du Bois 主理人 John)
博物館教人分辨真假薰衣草,並展覽了歷代蒸餾機,真薰衣草提煉的護膚品比香港買平一半,梗要大手入貨。
真薰衣草 (或純種薰衣草) 呈淺紫色,每根莖只有一朵花,花海看上去較稀疏。
假薰衣草 (或混種薰衣草) 奪目的彩紫色,一支莖有數朵小花及球狀花簇,在平地廣泛種植。
薰衣草精油(左) €26 / HK$225 衣草香氛(右) €48 / HK$415

Musée de la Lavande

地址:276 Route de Gordes, 84220 Coustellet, France

電話:+33(- 0)4-9076-9123

營業時間:(5月至9月)星期一至日 9am-7pm

入場費:€7 / HK$61

網址:www.museedelalavande.com

交通:從 Valensole 出發,途經 Manosque, 車程1小時30分鐘。

南法自駕遊貼士

南法的主要城鎮有火車,但最方便還是自駕遊。從Avis/Hertz/Enterprise等訂車,以我們舉例,在Enterprise訂了自動波的4人車,在里昂機場提取,租車7天,價錢為€512/HK$4,424,已包GPS、未計保險。油費每公升約€1.23/HK$11,每次入滿約HK$546。

相關文章:

孖閨密做冗員!$50/小時 冗員俱樂部 Hea過周末|土瓜灣好去處|

周末遊土瓜灣!牛棚 土炮遊樂場 +懷舊冰室+街坊豆品老店|土瓜灣好去處|

養生益腎! 腐竹麥米紅棗糖水 @Hilda 梁雅琳

關注我們Facebook專頁
    相關新聞
      更多瀏覽