〈娛樂乜乜乜〉被逼出來的發記士多
2017年05月19日12:30

【now.com娛樂】在香港拍戲,如果撈得掂,有大陸市場,係可以搵好多。你睇張家輝由笑臣轉返做大片男主角,真正稱得上紅到一線,都只係近十年嘅事,今日佢買間豪宅,講緊係1.3億嘅富豪數字,你話呢行好唔好搵?

但搵得多,唔代表搵得舒服,探得電影班多,就知道工作環境都幾惡劣,先唔講經常要連續通宵趕戲,只講環境,通常除非拍城市實景,否則一係入廠,一係去荒山野嶺。野外最辛苦,香港天氣潮濕蚊蟲多,夜媽媽著住戲服又焗又臭,拍到天光真係人都癲。片廠都唔好得幾多,四圍雜物,亦未必有冷氣,就算有冷氣都未必係好事,因為一定開到好凍,雪房咁。同埋真係得間廠,其餘乜都冇,想食嘢一係食外賣飯盒,一係叫助手揸車出去買,連續開工等埋位時,又係悶到人都癲。如果係大陸片場仲陰功,去過橫店幾次,食都冇啖好食,做完嘢返酒店仲要幾污糟㗎!

演員辛苦,工作人員仲慘,論工作環境,香港拍電影可謂數一數二差,同拍戲成本完全唔成正比。幾千萬拍部戲,花在改善工作環境嘅,可能一個零頭都冇,預咗演員同工作人員自己搞掂,有時見到都覺得幾無良。除非你咁好彩同周潤發開工,佢會開檔發記士多俾你飲吓湯食吓好嘢,有個位圍埋吹吓水,捱時間都易啲。

做娛樂記者多年,有幸去過荷里活電影探班幾次,見識吓人哋係點做嘢。同樣係電影工業,同香港真係天堂同地獄嘅分別,人哋都拍好長時間,但基本環境會安排得好好,會set好個地方俾你休息,會劃個位俾所有人食飯,準備埋自助餐型式食物長時間供應。起碼演員拍戲拍遲咗,去到都仲有熱嘢食,唔使捱凍燒味飯盒,休息又可以去飲杯咖啡食件三文治。主要演員每人都會安排一架小巴,可以在冷氣地方有張床瞓吓覺,廁所又乾淨,衛生都好過香港好多,就連工作人員都有車坐,最緊要係有得沖涼,體力勞動完都冇咁痛苦。

香港係咪做唔到呢?唔係喎,點解發哥又得嘅?分別係有冇心去搞,工會又有冇齊心去爭取呢?錢係有嘅,想賺盡啲唔想使在佢哋身上啫。以前成日笑大陸點差點差,人哋而家演員待遇就好過香港好多(工作人員就唔知啦,唔敢講)。呢個問題唔係電影圈獨有,香港普遍勞資關係都係勞大過資,其實呢啲嘢真係冇理由要發哥,即係資方自己做返,咁你啲老闆唔做,咪惟有有良心嘅前輩做囉,有乜辦法啫?

文:魯連

〈娛樂乜乜乜〉逢星期一至五刊登

將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

關注我們Facebook專頁
    相關新聞
      更多瀏覽