【跪玻璃了】send 錯訊息 爸爸小學家長 group 留言「賓周都損」
2017年05月19日23:18

而家個個都用手機通訊軟件傾計,朋友或同事間都會開埋大大小小嘅群組交流,一個人閒閒地都有五至六個群眾喺身,每次講嘢都要睇真啲,如果一覺唔覺意錯 group 嘅話都幾頭痕!

今日就有一段小學家長 group 嘅對話截圖流出,其中一位家長同其他人分享自己仔女患上外耳炎,希望大家都可以祝福佢,正當其他爸爸媽媽都留言希望小朋友快啲好返嘅時候,其中一位爸爸竟然留言「HJ兩Q,賓周都損」!呢位爸爸知道自己出事啦,即刻補返句「Sorry send 錯」,不過一切都似乎太遲啦,搞到成個家長群都知有人「損晒」。

正當大家都以為件事告一段落時,齊齊恥笑呢位爸爸咁大意錯 group 時,再有另一張對話截圖流出,呢疑似錯 group 嘅爸爸主動承認自己 send 錯 group ,形容自己「真係膠得好緊要」,但佢同時提到其他家長將有關對話放上網時,未有將群組名、成員名打格,令全世界都知道小朋友同學校嘅名,提醒大家下次再想將對話圖放上網前,「諗清楚件事會發展到點」。

關注我們Facebook專頁
    相關新聞
      更多瀏覽