【幫過趙世曾打工】Seasun話自己好貼地:地方舒服易啲高潮
2017年02月17日07:00

大台最近有個新節目叫《有樓萬事足》,入面有個「港女」叫Seasun,預告入面仲爆出多句「金句」,好似「有樓有高潮」、「冇樓唔好白撞」同埋「男人要有2000呎屋先係基本」!唔少網民封佢為「拜金港女」,仲即時起埋佢底。

22歲嘅Seasun原來係珠寶公司公關,已經有5年相關經驗,仲幫過趙世曾打工,工作範圍包括出席活動,影吓相,陪來自北京嘅客人等,亦參加過趙世曾舉辦嘅《國際旅遊小姐》,亦有指佢曾經搬入趙世曾嘅「趙苑」,足足有成萬四呎

面對負評,Seasun話自己「好proud of做港女」,佢接受一本雜誌嘅訪問時,聲稱話要大平反,但就似乎講多錯多!主持話佢:「如果搵到錢,養個小白臉都得啦。」Seasun就話:「我要個樣嘢係想男友貼心,如果冇時間陪我,咁用第二樣嘢代替。」但就答唔出乜係「第二樣」嘢!

至於Seasun句「有樓有高潮」,佢解釋:「我嗰句係有個安穩嘅住屋條件,喺個舒服啲嘅地方,容易啲達到高潮。」問到要成2000呎嘅樓,會唔會太過份,佢就話自己好「貼地」:「我去何文田睇樓,一個雙層單位依家都係860萬左右。」網民即刻笑佢係咪睇咗凶宅。

主持仲更「進一步」咁問佢:「你覺得以你條件,可唔可以換到一個2000呎嘅單位呢?」Seasun話:「Who Knows?我有嘅幻想之嘛,可能有啲難嘅,但不妨一試!」

講到趙世曾,佢亦有接受傳媒訪問,佢話對呢個Seasun冇印象:「我識咁多人,咁多人幫我打過工。」又話:「趙苑成日都會裝修,有時會安排馬來西亞、大陸員工嚟,係會畀地方佢哋住,但你哋講嗰女仔就冇印象。」

至於套《有樓萬事足》 被指同《盛女愛作戰》、《沒女大翻身》、《沒有起跑線?》一樣,好有可能係造假,幕後主腦岑應回應傳媒話:「冇事先安排劇本,第一次同Seasun覺得佢嘅思維好得意,其他我唔方便答!」

睇到呢度只可以講一句:加油呀Seasun!

關注我們Facebook專頁
    相關新聞
      更多瀏覽